Krossá er lítil bergvatnsá þar sem tvær stangir eru leigðar saman. Veiðisvæðið er um 8 km langt með 24 merktum veiðistöðum. Krossá er sjálfbær á og í þurrkatíð verður mjög lítið vatn í ánni, því er oft hægt að sjá laxinn. Auðvelt er að ganga nærri ánni og eingöngu er veitt á flugu. Öllum laxi skal sleppt, sem er mjög mikilvægt fyrir sjálfbærni árinnar.

Gott aðgengi er að veiðistöðum og fínt veiðihús fylgir ánni. Það er járnklætt timburhús með svefnplássi fyrir 10 manns, á einu svefnlofti og í tveimur herbergjum með efri og neðri koju hvort. Í húsinu eru öll helstu eldhúsáhöld, ísskápur, eldunarhellur, gasgrill og baðherbergi með sturtu.

Verönd er meðfram húsinu og við annan gafl þess. Farsíma samband er í húsinu. Veiðikort og veiðibók eru til staðar í húsinu.

Í rannsókn sem Hafrannsóknastofnun gerði árið 1988 kemur fram að meðalveiði áranna 1974 til 1988 var 113 laxar. Minnst var veiðin 41 lax og mest 180.